Fréttasafn

Boðið verður upp á leiðsögn í Listasafninu á Akureyri fimmtudaginn 30. apríl kl. 12.15 - 12.45 um sýningu Jan Voss, Með bakið að framtíðinni. Guðrún Pálína Guðmundsdóttir fræðslufulltrúi tekur á móti gestum og fræðir þá um sýninguna og einstaka verk.

Listasafnið á Akureyri tekur þátt í Listahátíð í Reykjavík þegar Þóra Sólveig Bergsteinsdóttir fremur gjörninginn Mannlegt landslag í Listasafninu, Ketilhúsi kl. 15 laugardaginn 30. maí.

Nú stendur yfir í Listasafninu, Ketilhúsi útskriftarsýning nemenda listnámsbrautar VMA, Fimmtán, sem opnaði síðastliðinn laugardag. Sýning á lokaverkefnum nemenda hefur lengi verið fastur liður í starfsemi listnáms- og hönnunarbrautar Verkmenntaskólans á Akureyri. Nemendur fá eina önn til að vinna að lokaverkefnum sínum og uppsetningu sýningar í samvinnu við leiðsagnarkennara og samnemendur þar sem áhersla er lögð á sjálfstæð vinnubrögð.

Á Vorkomu Akureyrarstofu á sumardaginn fyrsta var tveimur einstaklingum sem hafa með framlagi sínu stutt við og auðgað menningarlíf bæjarins veitt heiðursviðurkenning Menningarsjóðs. Þetta eru myndlistarkonan Iðunn Ágústsdóttir sem lauk nýlega umfangsmikilli einkasýningu í Listasafninu á Akureyri, Ketilhúsi, og Gunnar Frímannsson sem hefur komið að starfi Sinfóníuhljómsveitar Norðurlands frá upphafi og lagt sitt lóð á vogarskálarnar við uppbyggingu sveitarinnar.

Laugardaginn 25. apríl kl. 15 verður útskriftarsýning nemenda listnámsbrautar VMA, Fimmtán, opnuð í Listasafninu á Akureyri, Ketilhúsi. Sýning á lokaverkefnum nemenda hefur lengi verið fastur liður í starfsemi listnáms- og hönnunarbrautar Verkmenntaskólans á Akureyri. Nemendur fá eina önn til að vinna að lokaverkefnum sínum og uppsetningu sýningar í samvinnu við leiðsagnarkennara og samnemendur þar sem áhersla er lögð á sjálfstæð vinnubrögð.

Opið í Listasafninu sumardaginn fyrsta kl. 12-17, en lokað í Listasafninu, Ketilhúsi vegna uppsetningar útskriftarsýningar listnámsbrautar VMA. Verið velkomin.

Nú stendur yfir í Listasafninu á Akureyri viðamikil yfirlitssýning á ævistarfi myndlistarmannsins Jan Voss - hálfrar aldar listsköpun með tilheyrandi þróun. Sýningin er umfangsmikil og er því ekki hægt að gera henni ítarleg skil hér en þess í stað eru nokkrir þættir valdir úr og fjallað sérstaklega um þá, líkt og gert er á hádegisleiðsögninni á fimmtudögum í Listasafninu. Tenging Jans við Ísland hófst fyrir um 40 árum og hefur hann komið sér vel fyrir á Hjalteyri og dvelur þar eins oft og hann getur.

Framundan eru síðustu dagar yfirlitssýningar Iðunnar Ágústsdóttur í Listasafninu á Akureyri, Ketilhúsi, sem staðið hefur síðan 7. mars og lýkur næstkomandi sunnudag 19. apríl. Tilefni sýningarinnar er 75 ára afmæli Iðunnar (f. 1939) en húner fædd og uppalin á Akureyri, dóttir Elísabetar Geirmundsdóttur sem oft er nefnd listakonan í Fjörunni.

Laugardaginn 18. apríl kl. 14 opnar Jónborg Sigurðardóttir - Jonna, málverkasýninguna Jónborg - Eldborg í Mjólkurbúðinni í Listagilinu. Að þessu sinni tjáir Jonna kraft eldsins og lífsorkunnar í eigin tilfinningum í málverkum þar sem hún vinnur með akríl á striga.

Listasafnið á Akureyri efnir til sýningar á verkum eftir norðlenska myndlistarmenn 29. ágúst - 18. október 2015. Dómnefnd velur úr innsendum verkum listamanna sem búa og/eða starfa á Norðurlandi eða hafa tengingu við svæðið. Umsóknarfrestur er til og með 27. apríl næstkomandi.