Fréttasafn

Listasafnið á Akureyri líkt og allir landsmenn fagna því í dag, föstudaginn 19. júní, að 100 ár eru síðan íslenskar konur fengu kosningarétt. Af því tilefni verður lokað frá kl. 12.00 og starfsmönnum gefið frí til þess að taka þátt í hátíðardagskrá sem hefst í Lystigarðinum kl. 13 og endar með dagskrá á sviði á Ráðhústorgi.

Fimmtudaginn 18. júní kl. 12.15-12.45 verður boðið upp á leiðsögn í Listasafninu um sýningu Mireyu Samper, Endurvarp, sem opnaði síðastliðinn laugardag. Hlynur Hallsson safnstjóri tekur á móti gestum og fræðir þá um sýninguna og einstaka verk.

Opið verður í Listasafninu á þjóðhátíðardaginn 17. júní kl. 10-17. Vegna uppsetningar á listaverkefninu Rót verður Listasafninu, Ketilhúsi lokað fram að opnun næstkomandi laugardag, 20. júní, kl. 15.

Sunnudaginn 14. júní kl. 17 heldur japanski listamaðurinn Tomoo Nagai tónleika í Listasafninu á Akureyri, Ketilhúsi. Tomoo segist notar hljóð á svipaðan hátt og málari notar liti – til að fylla rými. „Hugmyndirnar sem tónlistin kallar fram eru skilgreindar út frá samspili sem verður til milli efnisins og rýmisins sem unnið er í hverju sinni. Tré, málmur, steinn, jörð, vatn… svo ótalmargir þættir í náttúrunni búa yfir ótrúlega hljómsterkri fegurð. Það er mjög mikilvægt fyrir mig að hlusta eftir þessari fegurð.“

Í dag, laugardaginn 13. júní, kl. 15 opnar Mireya Samper sýninguna Endurvarp í Listasafninu á Akureyri. Sýninginendurspeglar ferli og áhrif sem Mireya hefur unnið með og upplifað, bæði á Íslandi og í Japan, undanfarin misseri. Fjallað er um innri og ytri kosmós, óendanleikann, eilífðina, endurtekninguna og hringrásina – innri og ytri hringrás. Nánari upplýsingar um verk Mireyu má finna á heimasíðu hennar http://mireya.is

Laugardaginn 13. júní kl. 14 og 16.30 verður boðið uppá tónlistardagskrá í Listasafninu á Akureyri, Ketilhúsi þar sem Lára Sóley og Hjalti Jónsson munu flytja efni af vögguljóðaplötunni Draumahöll sem er nýútkomin. Lára leikur á fiðlu og syngur, en Hjalti leikur á gítar. Flutt verður blanda af íslenskum og erlendum lögum, þar af þrjú ný lög og textar.

Dagskrá Listasumars á Akureyri 2015 kom út í dag og var dreift í hvert hús á Akureyri og víðar. Listasumar hefst föstudaginn 12. júní, kl. 17 og stendur yfir til 6. september. Á opnuninni mun Hlynur Hallsson safnstjóri Listasafnsins á Akureyri segja nokkur vel valinn orð, umvafinn handverki kvenna, sem mun prýða Listagilið. Í framhaldinu taka við tvennir tónleikar; annars vegar mun Þjóðlistahátiðin Vaka bjóða upp á síðdegistóna í Deigluna og hins vegar er gestum og gangandi boðið að taka þátt í Tilraunakenndum sólarhring undir merkjum tón- og myndlistarhátíðarinnar Yms, frá kl. 18 til 18.

Fyrr í dag komu starfsmenn Slökkviliðsins á Akureyri í Listagilið og þrifu malbikið. Til stendur að mála götuna alls konar myndum í tilefni af opnun Listasumars á föstudaginn kl. 17. Þeir listamenn sem taka þátt í vinnunni eru Þóra Karlsdóttir, Dagrún Matthíasdóttir, Almar Alfreðsson, Jonna og Jónína Björg Helgadóttir. Áhugasamir geta komið við í Listagilinu og fylgst með gangi mála.

Listasumar á Akureyri hefst með pompi og prakt á morgun, föstudaginn 12. júní, kl. 17 og stendur yfir til 6. september. Listasumar var umgjörð fyrir listviðburði á Akureyri í tæpa tvo áratugi, sem og vettvangur fyrir listamenn til að koma sér á framfæri. Það verður nú endurvakið með svipuðum áherslum.

Fimmtudaginn 11. júní, kl. 12.15-12.45, verður boðið upp á síðustu leiðsögnina um Sköpun bernskunnar í Listasafninu, Ketilhúsi, en sýningunni lýkur næstkomandi sunnudag 14. júní. Guðrún Pálína Guðmundsdóttir, safnkennari og sýningarstjóri tekur á móti gestum og fræðir þá um sýninguna og einstaka verk.