Fréttasafn

Fyrsta Tólf tóna kortér vetrarins fer fram á laugardaginn, 5. október, kl. 15-15.15 og kl. 16-16.15, en þá mun gítarleikarinn Svanur Vilbergsson frumflytja verkið Staðir eftir Daniele Basini.

Þriðjudaginn 1. október kl. 17-17.40 heldur þýski myndlistarmaðurinn Wolfgang Hainke Þriðjudagsfyrirlestur um Flúxus-sýningarverkefnið Stranded – W(h)ale a Remake Portfolio – More Than This, Even, sem sett var upp í sölum 10 og 11 síðastliðið vor. Aðgangur er ókeypis.

Sunnudaginn 29. september kl. 15 mun þýska listakonan Detel Aurand kynna bók sína We are Here. Aðgangur er ókeypis.

Laugardaginn 28. september kl. 15 verða þrjár sýningar opnaðar í Listasafninu á Akureyri: Detel Aurand og Claudia Hausfeld – Samskipti, Georg Óskar – Það er ekkert grín að vera ég og Einar Falur Ingólfsson – Útlit loptsins – Veðurdagbók. Klukkan 15.45 hefst listamannaspjall við Georg Óskar, Detel Aurand og Claudia Hausfeld. Daginn eftir opnun, sunnudaginn 29. september, kl. 15 verður bókarkynning og upplestur á bók Detel Aurand, We Are Here.

Þriðjudaginn 24. september kl. 17-17.40 heldur þýski myndlistarmaðurinn og verkefnastjórinn Michael Merkel fyrsta Þriðjudagsfyrirlestur vetrarins undir yfirskriftinni Nobody Has the Intention to Green a Wall. Fyrirlesturinn fer fram á ensku og aðgangur er ókeypis.

Sunnudaginn 22. september kl. 11-12 mun Heiða Björk Vilhjálmsdóttir, verkefnastjóri fræðslu og miðlunar, segja börnum og fullorðnum frá sýningunni Stranded – W(h)ale a Remake Portfolio – More Than This, Even. Að lokinni leiðsögn er gestum boðið að búa til sitt eigið listaverk, innblásið af verkum sýningarinnar.

Fræðsluleiknum Sjáðu! – Vangaveltur um myndlist lýkur nú um helgina á Listasafninu. Leikurinn hefur verið í boði síðan í vor og hlotið frábærar viðtökur. Í leiknum er börnum og fullorðnum boðið að eiga samtal um myndlist, ferðast í huganum um hið víðfeðma norður og velta fyrir sér hugmyndum um leik og list. Tilvalið tækifæri til að staldra við og uppgötva eitthvað nýtt. Bragðgóð verðlaun í boði.

A! Gjörningahátíð fer fram á Akureyri 10.-12. október næstkomandi. A! er þriggja daga alþjóðleg gjörningahátíð sem haldin er árlega og nú í tíunda sinn. Ókeypis er inn á alla viðburði. Hátíðin er sú eina sinnar tegundar á Íslandi þar sem einungis er um gjörningalist að ræða úr öllum listgreinum.

Þriðji og síðasti Mysingur sumarsins fer fram á Akureyrarvöku, laugardaginn 31. ágúst kl. 17. Að venju verða tónleikarnir haldnir í Mjólkurporti Listasafnsins á Akureyri og að þessu sinni koma fram Skandall, Pitenz og Þorsteinn Kári. Enginn aðgangseyrir er á tónleikana og hægt verður að kaupa veitingar frá Ketilkaffi á svæðinu. Tónleikaröðin er hluti af Akureyrarvöku og unnin í samstarf Akureyrarbæjar, Listasafnsins á Akureyri, Ketilkaffis og Geimstofunnar.

Á Akureyrarvöku, laugardaginn 31. ágúst, kl. 15 verða fjórar sýningar opnaðar í Listasafninu á Akureyri: Fríða Karlsdóttir – Ekkert eftir nema mýktin, Jónas Viðar – Jónas Viðar í safneign, Oliver van den Berg – Á svölunum og fræðslusýningin Grafísk gildi. Klukkan 17 fara fram þriðju og síðustu tónleikar sumarsins undir heitinu Mysingur í Mjólkurporti Listasafnsins, en þá koma fram Pitenz, Skandall og Þorsteinn Kári. Dagskrá dagsins lýkur svo með gjörningi Yuliana Palacios og Steinunnar Arnbjargar Stefánsdóttur kl. 20 og 21.00. Í tilefni Akureyrarvöku verður Listasafnið opið til kl. 22 og enginn aðgangseyrir.