Fréttasafn

Sunnudaginn 21. maí næstkomandi kl. 15 verður heimildarmynd Magnúsar Jónssonar, Ern eftir aldri, frá 1975 sýnd í Listasafninu á Akureyri. Myndin er 27 mínútur að lengd og sýnd í tengslum við sýningu Steinunnar Gunnlaugsdóttur, blóð og heiður, sem nú stendur yfir í sal 06 í Listasafninu. Að lokinni sýningu myndarinnar verður listamannaspjall við Steinunni, stjórnandi er Hlynur Hallsson, safnstjóri.

Í tilefni Alþjóða safnadagsins, 18. maí næstkomandi, verður ókeypis inn á Listasafnið og boðið upp á leiðsögn kl. 15. Þá mun Heiða Björk Vilhjálmsdóttir, fræðslufulltrúi, fræða gesti um valin verk á yfirstandandi sýningum safnsins.

Laugardaginn 6. maí kl. 15 verða tvær sýningar opnaðar í Listasafninu á Akureyri: Nemendasýning Myndlistaskólans á Akureyri, Sjónmennt 2023, og útskriftarsýning nemenda listnáms- og hönnunarbrautar VMA, Þetta er ekki blað.

Sunnudaginn 30. apríl kl. 11-12 mun Heiða Björk Vilhjálmsdóttir, fræðslufulltrúi, segja börnum og fullorðnum frá sýningum Söru Bjargar Bjarnadóttur, Tvær eilífðir milli 1 og 3, og Guðjóns Gísla Kristinssonar, Nýtt af nálinni. Að lokinni leiðsögn er gestum boðið að búa til sitt eigið listaverk, innblásið af verkum listamannanna.

Í tilefni Eyfirska safnadagsins verður ókeypis inn á Listasafnið á sumardaginn fyrsta, 20. apríl. Boðið verður upp á leiðsögn og listsmiðju fyrir börn á leikskólaaldri kl. 11-12. Þá mun Heiða Björk Vilhjálmsdóttir, fræðslufulltrúi, segja frá sýningunni Sköpun bernskunnar.

Fimmtudaginn 20. apríl, sumardaginn fyrsta, kl. 11-12 verður leiðsögn og listasmiðja fyrir börn á leikskólaaldri í Listasafninu. Þá mun Heiða Björk Vilhjálmsdóttir, fræðslufulltrúi, segja börnum á leikskólaaldri frá sýningunni Sköpun bernskunnar. Að lokinni leiðsögn er gestum boðið að búa til sitt eigið listaverk, innblásið af verkum sýningarinnar. Aðgangur er ókeypis í boði Norðurorku sem styrkir sérstaklega safnkennslu og fræðslu fyrir börn og fullorðna í Listasafninu.

Laugardaginn 15. apríl kl. 12-16, verður boðið upp á opna listsmiðju í Listasafninu. Alls konar efniviður verður á staðnum og öll velkomin. Tilvalið tækifæri til að skapa sitt eigið listaverk og njóta samverunnar. Verkefnastjóri er Heiða Björk Vilhjálmsdóttir, fræðslufulltrúi.

Laugardaginn 15. apríl kl. 15.00-15.15 og kl. 16.00-16.15 verður Tólf tóna kortérið á dagskrá í Listasafninu. Þá munu þau Mathias Spoerry, söngvari og miðaldagrúskari, og Steinunn Arnbjörg Stefánsdóttir, sellóleikari, frumflytja tvö ný verk: Prologue fyrir selló eftir Wes Stephens, slagverksleikara á Egilsstöðum, og La Vieillesse, militant tónsmíð um ellina eftir flytjendurna sjálfa við texta Simone de Beauvoir. Að auki verða flutt tvö frönsk miðaldatónverk eftir G. de Machaut og Notre Dame skólann.

Listasafnið verður að venju opið alla páskana kl. 12-17. Hægt er að skoða 8 mismunandi sýningar í sölum safnsins.

Í janúar síðastliðnum auglýsti Listasafnið á Akureyri eftir umsóknum um þátttöku í samsýningu norðlenskra myndlistarmanna, Afmæli, sem mun standa yfir 2. júní - 24. september næstkomandi. Alls bárust umsóknir frá 44 listamönnum og yfir 100 verk, en forsenda umsóknar var að listamenn búi og/eða starfi á Norðurlandi eða hafi tengingu við svæðið. Listasafnið þakkar fyrir allar innsendar umsóknir. Sýningunni er ætlað að gefa innsýn í líflega flóru myndlistar á Akureyri og Norðurlandi. Að þessu sinni var valið sérstakt þema fyrir sýninguna, Afmæli, í tilefni af 30 ára afmæli Listasafnsins í ágúst.