Fréttasafn

Sunnudaginn 25. september kl. 11-12 verður fjölskylduleiðsögn í Listasafninu. Heiða Björk Vilhjálmsdóttir, fræðslufulltrúi, segir börnum og fullorðnum frá sýningu Gústavs Geirs Bollasonar, Sandtímasálmur um fölnandi jarðarblóm.

Laugardaginn 24. september kl. 15 verða sýningar Kristins G. Jóhannssonar, Málverk, og Rebekku Kühnis, Innan víðáttunnar, opnaðar í Listasafninu.

A! Gjörningahátíð fer fram á Akureyri dagana 6.-9. október næstkomandi. A! er fjögurra daga alþjóðleg gjörningahátíð sem haldin er árlega og nú í áttunda sinn. Ókeypis er inn á alla viðburði.

Þriðja rafræna listasmiðja Listasafnsins undir yfirskriftinni Sköpun utan línulegrar dagskrár er nú komin í loftið. Að þessu sinni hefur Vilhjálmur B. Bragason, leikari, leikskáld og tónlistarmaður umsjón með smiðjunni.

Laugardaginn 3. september kl. 15 verður boðið upp á listamannaspjall með Agli Loga Jónassyni um sýningu hans, Þitt besta er ekki nóg, sem var opnuð á Akureyrarvöku um síðustu helgi. Stjórnandi er Hlynur Hallsson, safnstjóri Listasafnsins.

Nú býður Listasafnið á Akureyri upp á fjölskylduleik um sýninguna Gjöfin til íslenzkrar alþýðu. Tilvalið tækifæri fyrir börn og fullorðna til að staldra við og uppgötva eitthvað nýtt. Bragðgóð verðlaun í boði!

Á Akureyrarvöku, laugardaginn 27. ágúst, kl. 15 verða þrjár sýningar opnaðar í Listasafninu á Akureyri: Egill Logi Jónasson – Þitt besta er ekki nóg, Steinunn Gunnlaugsdóttir – blóð & heiður og fræðslusýningin Form í flæði II. Blásarakvintettinn Norð-Austan mun stíga á stokk kl. 15.30 og kl. 17 hefjast svo þriðju og síðustu tónleikar sumarsins undir heitinu Mysingur í Mjólkurporti Listasafnsins. Að þessu sinni munu Drengurinn fengurinn, Teitur Magnússon og Dr. Gunni koma fram. Fjölskylduleiðsögn um Þitt besta er ekki nóg og blóð & heiður verður sunnudaginn 28. ágúst kl. 11-12. Enginn aðgangseyrir.

Laugardaginn 20. ágúst kl. 15 verður haldið útgáfuhóf í Listasafninu í tilefni útgáfu bókar Bryndísar Snæbjörnsdóttur og Mark Wilson, Óræð lönd. Bókin er gefin út í tengslum við sýningar þeirra Óræð lönd: Samtöl í sameiginlegum víddum, sem sett var upp í Gerðarsafni, og sýninguna Vísitasíur, sem sett var upp í Listasafninu á Akureyri. Fyrir síðarnefndu sýninguna hlutu þau Myndlistarverðlaun ársins 2022. Æsa Sigurjónsdóttir var sýningarstjóri sýningarinnar Vísitasíur en Becky Forsythe sýningarstjóri sýningarinnar í Gerðarsafni.

Listasafnið býður uppá skemmtilegan fjölskylduleik í sumar um sýninguna Gjöfin til íslenzkrar alþýðu. Tilvalið tækifæri fyrir börn og fullorðna til að staldra við og uppgötva eitthvað nýtt. Bragðgóð verðlaun í boði! Aðgangseyrir inn á safnið er ókeypis fyrir 18 ára og yngri.

Laugardaginn 16. júlí kl. 17 heldur tónleikaröðin Mysingur áfram í mjólkurporti Listasafnsins á Akureyri. Fram koma Drinni, Áslaug Dungal og Holy Hrafn. Enginn aðgangseyrir er á tónleikana. Hægt verður að kaupa grillmat og drykki frá Ketilkaffi á tónleikasvæðinu. Þriðji og síðasti tónleikadagurinn er 27. ágúst næstkomandi. Tónleikaröðin er samstarf Akureyrarbæjar, Ketilkaffis, Geimstofunnar, Listasafnsins á Akureyri, Kjarnafæðis og Kalda.