Þriðjudagsfyrirlestur: Þórgunnur Þórsdóttir

Þórgunnur Þórsdóttir.

Þriðjudaginn 4. mars kl. 17-17.40 heldur Þórgunnur Þórsdóttir, sérfræðingur á Safnasafninu, Þriðjudagsfyrirlestur í Listasafninu á Akureyri undir yfirskriftinni Með myndlistina í bakpokanum. Þar mun hún fjalla um hvernig myndlist hefur fléttast inn í ferðalag hennar frá áhugaljósmyndun í átt að menningarmiðlun, safnastarfi og sýningarhönnun.

Þórgunnur er með diplómu í teikningu frá Myndlistaskólanum í Reykjavík og bakkalárgráðu í samtímalist frá University of Cumbria á Englandi. Hún starfar á Safnasafninu, höfuðsafni íslenskrar alþýðulistar, en starfaði áður sem fræðslufulltrúi hjá Minjasafninu á Akureyri og sýningarstjóri hjá Svavarssafni, listasafni Svavars Guðnasonar, á Hornafirði. Þórgunnur hefur sett upp og skipulagt sýningar og viðburði á Íslandi og tekið að sér fjölbreytt safnfræðslu- og margmiðlunarverkefni.

Fyrirlestraröðin er samvinnuverkefni Listasafnsins á Akureyri, Verkmenntaskólans á Akureyri, Myndlistafélagsins og Gilfélagsins. Aðrir fyrirlesarar vetrarins eru Angelika Haak, myndlistarkona, Brynja Baldursdóttir, myndlistarkona, og fulltrúar Myndlistarfélagsins.