Opnun, tónleikar og gjörningur á Akureyrarvöku

Fríða Karlsdóttir, Ekkert eftir nema mýktin, 2024.

Á Akureyrarvöku, laugardaginn 31. ágúst, kl. 15 verða fjórar sýningar opnaðar í Listasafninu á Akureyri: Fríða Karlsdóttir – Ekkert eftir nema mýktin, Jónas Viðar – Jónas Viðar í safneign, Oliver van den Berg – Á svölunum og fræðslusýningin Grafísk gildi. Klukkan 17 fara fram þriðju og síðustu tónleikar sumarsins undir heitinu Mysingur í Mjólkurporti Listasafnsins, en þá koma fram Pitenz, Skandall og Þorsteinn Kári. Dagskrá dagsins lýkur svo með gjörningi Yuliana Palacios og Steinunnar Arnbjargar Stefánsdóttur kl. 20 og 21.00. Í tilefni Akureyrarvöku verður Listasafnið opið til kl. 22 og enginn aðgangseyrir.

Mjúk áferð Fríðu

Fríða Karlsdóttir útskrifaðist af myndlistarbraut Gerrit Rietveld Academie í Amsterdam í Hollandi 2020. Hún býr og starfar á Akureyri, þar sem hún er hluti af sjálfstæða listhópnum Kaktus, sem stendur fyrir margs konar menningarstarfsemi í Ketilhúsinu á neðstu hæð Listasafnsins.

Fríða vinnur með sögusagnir í gegnum blandaða miðla, vídeóverk, skúlptúra, textaverk og ýmiss konar handverk. Verk hennar líkjast oft náttúrulegum fyrirbærum, þau innihalda sterkar táknmyndir og þannig dramatíserar hún hversdagsleikann og segir frá einlægum upplifunum. Fríða hefur sýnt bæði hér á landi og erlendis.

Jónas Viðar í safneign

Jónas Viðar Sveinsson (1962-2013) stundaði nám við Myndlistaskólann á Akureyri 1983-1987 og framhaldsnám við Accademia di Belle Arti di Carrara á Ítalíu 1990-1994, þar sem hann útskrifaðist með hæstu einkunn. Eftir nám flutti Jónas aftur til Akureyrar þar sem hann var með vinnustofu í Listagilinu og starfrækti Jónas Viðar Gallerí í nokkur ár, þar sem nú er Mjólkurbúðin – salur Myndlistarfélagsins.

Stök fjöll, eyjur og vötn eru áberandi í málverkum Jónasar Viðars, en einnig mannslíkaminn í eldri verkum. Á þessari sýningu má sjá verk hans sem eru í eigu Listasafnsins á Akureyri.

Jónas var virkur í sýningahaldi og kenndi auk þess við Myndlistaskólann á Akureyri og rak um tíma sinn eigin skóla. Síðar flutti hann til Reykjavíkur og vann áfram að myndlist og rak Jónas Viðar Gallerí í porti við Laugaveginn. Hann hélt yfir 40 einkasýningar á Íslandi og erlendis og tók þátt í fjölda samsýninga.

Oliver van den Berg situr á svölunum

Oliver van den Berg hefur getið sér góðan orðstír með skúlptúrum og innsetningum byggðum á tæknilegum tólum, s.s. flugritum, stjörnuvörpum, myndavélum og hljóðnemum. Saga tækninnar á tuttugustu öld, sem og dægurmenning nútímans og spurningar er varða félagslega raunhæfa samgöngumáta, eru þættir sem koma fram í verkum hans sem hornsteinar félagslegrar samheldni. 

Þó að þessi verk virðist innihalda eftirlíkingar af raunverulegum hlutum, eru þeir raunar gerviblendingar sem flakka á milli þess upprunalega og eftirlíkingarinnar. Það er ekki fyrr en endurgerðin er ígrunduð sem við gerum okkur grein fyrir hversu kirfilega flækt við erum í slíka hluti; vensl sem við felum í skáldskap og frásögnum svo hægt sé að þykjast hafa vald yfir þeim. Í strípuðum einfaldleika sínum er þetta hins vegar ennþá hulin ráðgáta.  

Oliver van den Berg er frá Essen í Þýskalandi, en býr nú og starfar í Berlín. Fyrir þessa sýningu mun hann skapa sérsniðin verk fyrir svalirnar á Listasafninu.

Grafísk gildi

Orðið grafík kemur úr grísku og þýðir að skrifa, teikna eða rista. Notaðar eru ýmsar mismunandi aðferðir við gerð grafíklistaverka og hefur hver aðferð sín ákveðnu einkenni og eiginleika. Sérstaða grafíkverka felst í möguleikum þeirra til fjölföldunar, þ.e.a.s. gera mörg eintök af sömu mynd.

Markmið sýningarinnar er að fræða safngesti um grafíklistina og kynna valin grafíkverk úr safneign Listasafnsins. Verkin eru af ýmsum toga og eftir ólíka listamenn, bæði innlenda og erlenda. Þá gefst safngestum einnig tækifæri til að doka við í sýningarrýminu og skapa sína eigin list í hvetjandi umhverfi. Að skapa í listasafni er einstök upplifun og nota má verkin á veggjunum sem innblástur í eigin sköpun, blanda saman litum, línum, formum og áhrifum úr ólíkum verkum.